4 dagar búnir

Þá er ég búin að arka í 4 daga samfleytt. Hálfnuð með undirbúningsprógrammið. Þetta gengur bara fínt. Gott að fá hjartað aðeins af stað og finna þreytu í lærum og rassi (ekki veitir nú af að tálga aðeins utan af á því svæði) Samkvæmt planinu á að ganga 20 mín á dag fyrstu 4 dagana. Ég hef nú alltaf farið aðeins fram úr því, og næstu fjóra daga á að ganga í 30 mín á dag. Þá daga verð ég í Leirufirði og mun því arka þar um fjöru og firnindi (ekki svo mikið um fjöll). Það er stefnt á Leiró á föstudagsmorgun og til baka á mánudag. Við förum svo kannski aftur seinna í sumar.

Síðstu tvo daga fékk ég félagsskap á göngunni og er það bara skemmtilegt.

meira seinna

Sóley

Af hverju ísbjörn?

Svo ég útskýri nú af hverju ég valdi að skrifa sem ísbjörn þá var það þannig að í vetur (löngu fyrir heimsóknir ísbirna til landsins) prjónaði ég mér stóra og mikla, ljósgráa lopapeysu. Hún er úr Bulky lopa og prjónuð á prjóna nr. 12 (fyrir þá sem þekkja til). Ég sagði þá að mér liði eins og ísbirni í henni og eftir það er þessi peysa aldrei kölluð annað en ísbjörninn. Mér var ráðlagt að fara varlega þegar ég færi á stjá í þessari peysu svo ég yrði nú ekki skotin á færi.

Eftir að ég ákvað að reyna mig við hlaup/labb/rölt eða hvað verður úr þessu hjá mér, dró ég fram ljósan vindjakka til að labba í og aftur leið mér eins og ísbirni svo það hentar mér bara alveg ágætlega að líkja mér við ísbjörn.

Meira seinna

Vera eins og hinir

Á maður ekki að vera eins og allir hinir?

Er bara að prófa þetta svona til að byrja með.

En ég er sem sagt ísbjörn, hef legið í hýði en er að reyna að drattast af stað. Þetta blogg á að vera aðeins um þessar tilraunir mínar og kannski eitthvað fleira, tíminn leiðir það í ljós.

Ég prentaði út æfingaáætlun fyrir byrjendur á hlaup.is og byrjaði í gær að fara eftir því. Ganga fyrst í 8 daga, er búin með 2. Fór í dag og keypti mér skó og svo er bara að taka slaginn við letipúkann, og alla hina púkana sem draga mann niður.

Læt vita hvernig gengur.

Kv Björninn